Login to your account

Username *
Password *
Remember Me

“Promesa Falsu” AMP: Promete tan Kampu Serbisu 60.000 iha Tempu Badak

Tempotimor (Dili)-Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak halo hikas promesa atu loke kampu serbisu 60.00 ba joven sira.

Promesa ida ne’e, sai ona nu’udar promesa “baibain” ne’ebé AMP seidauk bele realiza. Hahu kedan iha aprezentasaun programa Governu daualuk iha meadus 2018 no iha Orsamentu Jeral Estadu ba 2019, AMP mós promete sei loke kampu serbisu hamutuk 60.000 kada tinan ba Timor-oan sira, maibé to’o tinan 2019 nia rohan, promesa ne’e la sai realidade.

Iha debate Orsamentu Jeral Estadu (OJE) 2020, dala ida tan AMP hasai promesa ida atu kria kampu serbisu 60.000 ba Timor-oan sira. Promesa ne’e akompaña ho lia-fuan “tempu besik” katak la kleur tan kampu serbisu 60.000 sei iha ba Timor-oan sira.

Promesa ba kampu serbisu ne’e hato’o direitamente husi Primeiru Ministru Taur Matan Ruak bainhira aprezenta proposta OJE 2020 iha Parlamentu Nasionál.

"Governu sei harii sentru formasaun exelénsia iha Hera, ida ne'e sei apoiu ba kapitál dezenvolvimentu umanu no husi ida ne'e sei ajuda no kontribui hodi atinje metas ambisioza governu nian ne'ebé atu kria kampu serbisu 60.000 iha prazu badak nia laran," deklara PM Taur iha plenaria PN, Segunda (02/12/19).

Maske konsiente katak defisil atu atinze metas ambisiozu ida ne’e, maibé PM Taur dehan, governu ne’ebé nia lidera firme hodi realiza promesa refere.

PM Taur hatete, governu sei atinze metas ambisiozu ida ne’e tanba hetan apoiu husi PN.

“Ho espíritu lealdade no respeita tomak ba responsabilidade konstituisionál ida-idak nian, ita bele alkansa metas ne'ebé preve iha programa governu nian iha lejislasaun ida ne'e nia rohan,” katak Xefe Governu ne’e.

Iha fatin ketak, joven ida, Agustinho da Costa (26) ne’ebé hela iha Suku Komoro, Dili, pesimista ho promesa husi PM Taur.

Tuir nia, promesa ne’e la’os buat foun ida, tanba dezde sa’e ba PM, Taur Matan Ruak halo ona promesa ida ne’e, maibé nunka realiza iha pratika.

“Ne’e promesa falsu ida, tanba realidade ha’u ho ha’u-nia maluk lubuk ida to’o ohin loron sei nafatin dezempregu, serbisu laiha,” dehan joven ne’e ba Tempotimor.com iha palasiu governu nia oin.

Tanba baruk hein promesa ne’e, Agostinho ne’ebé remata de’it eskola nivel Sekundaria ne’e daudauk ne’e esforsu hela atu trata dokumentus hodi ba serbisu iha Inglatera.

Joven ne’e sente pesimista tebes ho oportunidade ba serbisu iha Timor Leste ohin loron nian, tanba atu hetan serbisu kiik ida mós presiza iha koneksaun ema laran ka pelumenus tenke sai membru husi partidu politiku ida.

“Atu hetan serbisu ida agora tenke sai membru ba partidu ruma, se lae susar tebes,” dehan joven ne’e.

Rate this item
(1 Vote)
Last modified on Monday, 02 December 2019 14:12
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter