Molok governu AMP aprezenta proposta OJE 2020 mosu ona kritika ne’ebé la’os de’it mai husi sosiadade sivil no opozisaun, maibé mós mai husi deputadu husi bankada ne’ebé apoiu governu.
Hafoin halo aprezentasaun ba proposta OJE 2020 iha Segunda (02/12), ikus mai iha loron daruak diskusaun jeneralidade OJE 2020 iha Tersa (03/12), Xefe Governu deside hodi retira proposta OJE 2020.
"Retira proposta orsamentu, tanba razaun primeiru númeru orsamentu boot no segundu nivel ezekusaun, entaun deputadu sira hakarak altera, ami aseita atu reajusta orsamentu ne'e, hodi aprezenta fila-fali ba Parlamentu Nasional," deklara PM Taur ba jornalista sira hafoin diskusaun loron daruak, iha PN.
PM Taur dehan, governu AMP tenke halo redusaun ba orsamentu iha proposta OJE 2020 tanba deputadu hotu-hotu hakarak.
Xefe Governu ne’e agradese ba Prezidente PN no deputadu sira ninia pasensia no ajuda ona governu.
"Ha'u hakarak agradese ba Prezidente Parlamentu Nasionál no distintus deputadus hotu, ne'ebé fó kontribuisaun par hadi'a fali OJE 2020, preokupasaun sira ne'e lejítimu no rejista," dehan nia.