Foin lalais, iha deputadu sira-nia oin, PM Taur deklara retira OJE 2020 no promete atu halo redusaun ba montante OJE hafoin sei lori fila fali ba Parlamentu Nasionál iha 13 Dezembru 2019 hodi diskuti no aprova.

Lee mós: PM Taur ne’ebé “Rende” ba PN

Relasiona ho redusaun ba montante OJE 2020, PM Taur dehan, redusaun OJE ne’e la’os kestaun hatuun de’it númeru osan, maibé sei ko’a mós metas hirak ne’ebé iha.

"Emves dezenvolvimentu ne'e lalais, ita neineik tanba ko'a ona osan," dehan PM Taur ba jornalista sira hafoin hasoru-malu ho Prezidente Republika Francisco Guterres Lu Olo iha palasiu Prezidensial Bairro-pite, Kinta (05/12/19).

Xefe Governu ne’e esplika, bainhira koa montante OJE 2020, signifika mós tenke ko’a osan ba projetu sira ne’ebé hakarak atu implementa.

Tanba ne’e, nia afirma, dezenvolvimentu ba povu Timor Leste mós sei la’o neineik.

“Kuandu ita realiza festa ida, hakarak konvida ema barak atu partisipa, mais kuandu osan uitoan dei't, ita sei la atinzi atu konvida ema barak,” dehan Taur hodi fó ezemplu.