Komemora Loron Invazaun ho Liberdade João Cancio

Eis Ministru Edukasaun ,João Câncio Freitas Eis Ministru Edukasaun ,João Câncio Freitas FOTO ARKIVU

Tempotimor (Dili)-Loron 7 Dezembru sai nu’udar loron istoriku ba povu Timor Leste. Iha loron ne’e iha tinan 1975, militar Indonezia hahú hala’o invazaun ba Timor Leste. Ba tinan ida ne’e, povu Timor Leste sei “selebra” loron invazaun ho liberdade eis Ministru Edukasaun João Cancio Freitas.

Tuir informasaun ne’ebé Tempotimor.com asesu, eis Ministru Edukasaun ne’ebé tama prizaun tanba krime administrasaun danosa iha Sesta (06/12) tuir ona prosesu atu hetan liberdade kondisional iha Tribunal Distrital Dili (TDD) hafoin Advogado husi SJG, hatama pedidu liberdade kondisional.

Liu husi prosesu ne’e, TDD deside hodi fó liberade ba eis ministru ne’ebé kumpri ona pena prizaun tinan rua (2) fulan tolu (3) husi total pena prizaun tinan haat (4) fulan neen (6) ne’ebé hamonu ba nia.

“Agora nia (João Cancio) hetan ona liberdade depois de nia kumpri ona tinan rua (2) fulan tolu (3) hanesan ne’e. Aban hanesan ne’e nia hetan liberdade,” informa advogadu José Manuel Gomes Guterres husi Advogado SJG, ba Tempotimor.com, Sesta (06/12).

Hatan kona-ba prosesu ne’ebé advogadu ne’e durante ne’e halo ba ninia kliente, José dehan, nia hahú akompaña ninia kliente dezde inisiu to’o tama prizaun no mos to'o hetan liberdade kondisional.

Hafoin hetan pena prizaun no kumpri ona pena balun, José dehan, nu’udar advogadu nia parte mós husu ba tribunal atu bele fó lisensa ba João Cancio hodi ba vizita nia familia iha fin da semana.

“Depois de nia kumpri tempu balun iha prizaun, ami halo rekerimentu balun par nia bele ba vizita familia iha fin da semana,” dehan nia.

Esforsu seluk, nia dehan, nia parte mós halo pedidu atu ninia kliente mós bele hetan indultu husi Prezidente Repúblika.

Maibé, felizmente, idultul ne’e la konsege realiza tanba PR hafoin rona Ministériu Públiku, tribunal no Ministériu Justisa deside hodi la fó indultu.

Hafoin prosesu hirak ne’e hotu, ikus mai advogadu ne’e konsege liberta duni João Cancio husi prizaun.

“Depois to’o tempu ona atu halo pedidu ba liberdade kondisional, ami halo, i foin mak hetan, ohin Tribunal Distrital Dili sira rona tekniku husi reinsersaun sosial, diretor estabelesimentu prizional prizaun Gleno, rona mós Ministériu Públiku, maibé sira hotu-hotu fó opiniaun favoravel ba liberdade kondisional,” deklara nia.

Iha biban ne’e, nia informa, tribunal mós rona kondenadu deklarasaun husi João Cancio ne’ebé hakarak mós atu hetan liberdade kondisional.

“Nia rasik hatete katak nia mós hakarak liberdade kondisional i nia mós fó ninia deklarasaun katak prontu atu reintegra iha sosiadade, hamutuk ho ninia familia, buka serbisu, kontribui ba dezenvolvimentu sosiadade”.

“Nia hanesan ema ida ne’ebé mak iha formasaun superior maka’as, ema ida ho valores morais mós maka’as, entaun ema ida ke bele kontribui ba formasaun ho edukasaun ita-nia sosiadade, joven sira, prinsipalmente estudante, hodi dezenvolve ita-nia rain ho kuadrus ne’ebé mak di’ak,” dehan advogadu ne’e.

Tuir fontes tempotimor.com iha Prizaun dehan eis Ministru edukasaun ne'e sai kedan iha tuku 17:00 OTL iha Sexta Feira (06/12).

 

Abilio Lima no Domingos Caero Livre Kleur Ona

Entretantu, eis membru governu na’in rua, Abilio Lima no Domingos Caero, hetan ona liberdade kondisional iha fulan hirak liu ba.

Eis Sekretariu Estadu Ambiente Abílio Lima hetan liberdade kondisional iha 15 Jullu 2019 hafoin hetan pena prizaun tinan tolu (3) iha 15 Janeiru 2018.

Fofoun, Abilio Lima kondenadu ba krime pekulatu ho pena prizaun tinan lima (5), maibé hafoin hatama rekursu ba Tribunal Rekursu (TR), ikus mai hatuun ba tinan tolu (3).

Hafoin tama prizaun tinan ida (1) fulan neen (6), Abilio Lima mós iha direitu atu hetan liberdade kondisional.

Enkuantu, eis Sekretariu Estadu Obra Públika Domingos Caeiro hetan liberdade kondisional iha 25 Juñu 2019. Domingos Caero tama iha prizaun iha 25 Setembru 2017.

Eis Sekretariu Estadu ne’e sai kondenadu ba krime abuzu poder, administrasaun danosa no partisipasaun ekonomiku iha negosiu ho pena prizaun tinan tolu (3) fulan neen (6).

Fofoun, tribunal kondena Domingos ho pena prizaun tinan 10, maibé pena ne’e hatuun hafoin haruka karta rekursu ba TR.

Hafoin kumpri pena prizaun tinan ida (1) fulan sia (9), eis Sekretariu Estadu ne’e hetan liberdade kondisional.

Rate this item
(0 votes)
Last modified on Saturday, 07 December 2019 12:53
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.