Deputadu bankada FRETILIN, David Dias Ximenes Mandati, husu ba governu atu tenke iha politika ida ne’ebé di’ak hodi lori hikas mate-ruin sira.
"Husu governu buka tuir Saudozu sira hanesan Nicolau Lobato, prezidente Carvarinho, Yohanes Baxarelha, depois limpeza 79, Agustinho Tilman, João Conceição, depois akonntesimentu iha 1980, kalan-kalan lori sai sira ba iha ne'ebé?, depois sira iha 1983 lori ba Kupang ne'e ita la hatene sira agora iha ne'ebé, mate iha ne'ebé," dehan Mandati iha PN, Segunda (09/12/19).
Deputadu ne’e kestiona politika governu ne’ebé to’o ohin seidauk hatudu seriedade ba buka tuir saudozu sira-nia ruin.
"Tanba saida mak to'o ohin loron seidauk iha polítika ida klara hodi fó fila ita-nia saudozu sira-nia ruin. Tanba ne'e ha'u rezista hodi ko'alia nafatin bainhira governu nia resposta la konvense ha'u," dehan Mandati.
Iha fatin hanesan deputadu PLP Noé da Silva "Buka Tuir" dehan, tempu ona atu buka tuir saudozu sira ne'ebé mate.
"Ha'u salienta deputadu Mandati, tanba ohin loron tempu ona atu buka tuir ita-nia saudozu sira nia ruin, tanba ita la fiar katak bainhira jerasaun foun sira ne'ebé tuir mai ne'e sei iha inisiativa hodi buka tuir saudozu sira ne'e nia ruin," dehan Noé
Tuir nia, daudaun ne’e Xefe Estadu no Xefe Governu mesak ema rejistensia de’it, tan ne’e presiza kria ona politika hodi buka tuir saudozu sira-nia ruin.
“Agora ne'e tempu ona tanba ita-nia Primeiru Ministru no Prezidente Repúblika ne'e mesak ema rezistensia de'it, tanba ne'e iha sira na'in rua nia ukun (presiza) halo ona polítika buka tuir ona saudozu sira ne'e nia ruin," dehan nia.