“Elia ho Mau Coli Merese Tama Lista Remodelasaun”

Deputada husi Partidu KHUNTO, Olinda Guterres iha hela Plenaria Parlamento Nasional Deputada husi Partidu KHUNTO, Olinda Guterres iha hela Plenaria Parlamento Nasional Foto Arkivu

Tempotimor (Dili)-Deputada Bankada KHUNTO Olinda Guterres husu ba Primeiru Ministru Taur Matan Ruak atu hatama iha Vise Ministru Saúde na’in rua, Elia dos Santos Reis Amaral no Bonifacio Mau Coli, iha lista remodelasaun.

Deklarasaun deputada KHUNTO ne’e relasiona ho gravasaun lian husi vise ministru saúde na’in rua ne’e, ne’ebé espala iha media sosial.

Tuir deputada ne’e, gravasaun lian entre lider MS na’in rua ne’e haksesuk-malu tanba poder, tan ne’e, di’ak liu PM Taur hatama sira ba lista remodelasaun.

"Feto ida ho mane ida mak haksesuk-malu (tan) poder, ne'e halo ita moe. Husu ba governu, kuandu sira na'in rua haksesuk-malu ba pozisaun ne'e di'ak liu sira na'in rua tuun hotu. Matenek agora ne'e barak, la'os sira na'in rua ne'e de'it, halo moe aan," deklara Olinda iha plenária Parlamentu Nasional (PN), Segunda (09/12/19).

Olinda dehan, nia ezije hatuun vise MS na’in rua ne’e la’os tanba hakarak atu KHUNTO nia ema mak ba tuur iha ne’eba, maibé tanba lakohi atu ema hamonu dignidade governu ne’e.

“Kualker see mak matenek bele ba tuur iha ne'ebá (troka Elia ho Mau Coli),” dehan nia.

Iha fatin hanesan, deputadu bankada Partidu Demokrátika António da Conceição preokupa ba hahalok vise MS na’in rua ne’e.

"Komprtamentu ne'ebé dadaun la'o ne'e halo ita ba ospital mós ita ta'uk. Tanba governante sira haksesuk-malu tan ona ne'e, keta halo ba nia efeitu ne'e ba fali pasiente sira. Governu tenke iha seriedade par haree problema sira ne'e," dehan António.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.