Iha 3 Dezembru foin lalais, hafoin aprezentasaun ba proposta OJE 2020 ba loron daruak, PM Taur deside hodi retira proposta OJE 2020.

"Retira proposta orsamentu, tanba razaun primeiru númeru orsamentu boot no segundu nivel ezekusaun, entaun deputadu sira hakarak altera, ami aseita atu reajusta orsamentu ne'e, hodi aprezenta fila-fali ba Parlamentu Nasional," deklara PM Taur.

Lee mós: PM Taur ne’ebé “Rende” ba PN

Ba kestaun ne’e, Premiadu Nobel da Paz konsidera desizaun governu AMP hodi retira proposta OJE 2020 husi Parlamentu Nasionál sai nu’udar derrota ida ba governu.

“Derrota ida tanba kuandu lori orsamentu ne’e ba parlamentu nasionál, o nia bankada rasik boot liu iha parlamentu, maibé koligasaun la apoia, ne’e umillasaun (moe) boot ida, lolos devia diskute. Ha’u respeitu Primeiru Ministru (Taur Matan Ruak), (maibé) ha’u triste tanba koligasaun rasik halo situasaun ida ne’e akontese, ne’e laos FRETILIN mak halo maibé koligasaun rasik mak halo,” deklara Horta ba jornalista Iha Lalenok ba Ema Hotu nia kna'ar fatin (09/12).

Hatan kona-ba solusaun saida mak presiza foti ba situasaun ida ne’e, Horta dehan, presiza iha dialogu entre lider AMP ho bankada AMP iha PN no halo mós dialogu ho opozisaun sira atu nune’e proposta OJE 2020 bele hetan aprovasaun iha tempu badak.

“Solusaun mak ida ne’e, ba interese nasionál, ba estabilidade rai ida ne’e, lideransa koligasaun primeiru tenke haree, se sira bele haree hadia orsamentu, tempu badak halo diálogu ho bankada, bele karik halo dialogu mós (ho) opozisaun par lori ba Parlamentu orsamentu ne’e aprova iha tempu badak,” dehan Horta.

Tuir eis Xefe Estadu ne’e, presiza aprova lalais atu nune’e OJE 2020 bele hahú implementa ona iha 2 Janeiru 2020.

“2 de janieru hahú implementa orsamentu ne’e, ida ne’e hanesan ha’u-nia mehi, mehi ne’e konsegue realiza ka lae ne’e depende ona ba kapasidade lideransa koligasaun nian, iha koligasaun nia leet rasik, buka halo dialogu,” nia dehan.

Maske nune’e, Horta hatete, lider AMP hanesan Xanana no Taur, no mós figura FRETILIN hanesan Mari Alkatiri no Rui Maria de Araujo iha autoridade boot no iha kapasidade ne’ebé di’ak hodi buka solusaun ba problema ne’ebé mosu daudauk ne’e.

“Xanana, Taur, Mari Alkatiri no Rui Maria, sira iha autoridade boot, sira iha kapasidade ne’ebé di’ak, hanoin rai ida ne’e,” nia hatete.