Tempotimor (Dili) – Governu Timor-Leste, sei deve tan Banku Mundiál (BM) nia osan hamutuk millaun $59, atu halo reabilitasaun estrada Gleno-Hatubuiliku.
"Konsellu Ministru akompaña aprezentasaun hosi Ministra Finansas, Sara Lobo Brites, kona-ba empréstimu ne'ebé sei negosia ho Banku Mundiál, kona-ba halo reabilitasaun no manutensaun ba estrada iha Glenu-Letefoho-Hatubiliku," dehan Ministru Prezidensia Konsellu Ministru (MPKM) Agio Pereira iha Palásiu Governu, hafoin remata reuniaun Konsellu Ministru, Kuarta (18/12/19).
Ministru ne'e dehan, akordu ne'ebé Ministra Finansas (MF) Sara Lobo Brites halo ho Banku Mundiál ne'e, atu reabilita estrada husi diresaun Gleno to'o Hatubuiliku.
"Estrada ne'ebé ohin temi ne'e nia distánsia kilómetru 44.3. Nune'e, osan ne'ebé atu gasta mak millaun $ 70.81. Tanba ne'e millaun $ 59 mak mai husi empréstimu Banku Mundiál nian," tenik Agio.
Governante ne'e dehan, kontratu ne'ebé MF ho BM halo, bolu maturidade ne'e to'o tinan haatnulu.
"Kontratu bolu maturidade ne'e sei to'o tinan haatnulu. Entaun tinan 10, seidauk selu jurus. Maibé, tinan 30 ba oin mak sei simu jurus, inklui konklui ita nia emprestimu. Ne'e polítika governu nian duni, enkoraza emprestimu hodi bele hatún todan husi fundu petrolífeiru," tenik Agio.
Tempu konstrusaun ka reabilitasaun estrada Gleno-Letefoho-Hatubuiliku ne'e, sei hala'o durante tinan tolu no sei hahú iha tinan 2020 no remata iha tinan 2023.