Ohin, OJE 2020 Submete Ba PN Ho Montante Billaun $ 1.668 

Palasiu do Governu Palasiu do Governu Foto tempotimor.com
Tempotimor (Dili) – Konsellu Ministru, Kinta (19/12/19) dadeer, aprova ona proposta lei ba Orsamentu Jerál Estadu (OJE) 2020 ho montante billaun $ 1.668. Tuir planu, proposta OJE 2020 ne'e, sei submete filafali ba Parlamentu Nasionál, ohin parte lokraik.
 
Ministra Finansas interina, Sara Lobo Brites afirma, Konsellu Ministru aprova Orsamentu Jerál Estadu nian ba tinan 2020 ne’ebé ho despeza publika estimada tuir orden billaun $ 1.668, inklui reseita ne’ebé mai hosi RAEOA/ZEEMS, União Europea no Empréstimu, hodi kobre ba nesesidade tomak programa no prioridade nasionál sira ne’ebé VIII Governu Konstitusional defini tiha ona.
 
“Hosi valór ne'ebé sei afeta ba millaun $ 235,610 ba Saláriu no Vensimentu, millaun $ 583,800 ba Bens no Servisu, millaun $ 328,206 ba Transferénsia Públika no millaun $ 31,488.837 ba Kapitál  Dezenvolvimentu,” Sara Lobo informa hafoin reuniaun Konsellu Ministru iha Palásiu Governu, Kinta (19/12/19).
 
Nia afirma, proposta foun ba OJE 2020 ne’e sei haruka filafali ba Parlamentu Nasionál iha Kinta ohin, parte lokraik. 
 
"Iha OJE ne'e sei sujeitu uitoan iha alterasoes. Tanba ne'e, ami sei servisu par kompleta buat balu, i proposta orsamentu ne'e mós, orsida (Kinta) maizumenus tuku 05.00 lokraik, ami sei entrega kedas ba Parlamentu Nasional," Sara Lobo dehan. 
 
Ministra interina ne'e esplika, OJE 2020 prepara haktuir ba prinsípiu fundamentál lima (5) maka hanesan; sustentabilidade fiskál iha tempu médiu no longu prazu nian, aliflamentu ho prioridade nasionál sira, kapasidade ezekusaun orsamentál, kapasidade halo absorsaun ba ekonomia lokál no kualidade orsamentu nian.
Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.