Tempotimor (Dili) – Orsamentu Jerál Estadu (OJE) 2020 ba Sekretáriu Estadu Protesaun Sivíl (SEPS), ne'ebé redús fó impaktu ba vítima inséndiu no dezastre naturais, hamutuk 5.600 iha munisípiu Aileu, Bobonaro, Likisa no Ermera. To'o agora, vítima hirak ne'e seidauk hetan apoiu umanitariu.
“Ita presiza atu apoiu. Maibé, OJE 2020 ba SEPS redús husi millaun $ 15 ba millaun $ 3 fó afeta ba ajuda umanitariu. Tanba, redús osan, redús mós atividade balu,” informa SEPS, Alexandrino Xavier de Araújo, hafoin hasoru PM Taur Matan Ruak iha Palásiu Governu, Kinta (19/12/19).
“To'o agora, dadus kona-ba dezastre naturais balu tama ona i balu seidauk. Sistema orsamentu mós taka ona. Oinsá ita atu rezolve problema," Alexandrino dehan.
Nia informa, ohin dia 19 Dezembru membru governu nain 4 sei ba fatin afeitadu, hodi haree liu ba akontesimentu ne'ebé emergensia iha Aileu, Likisa, Ermera no Bobonaru.
"Ohin, ha'u ba Aileu, Ministra Solidariedade Sosial Inkluzaun (MSSI) ba Ermera, Vise Ministra Solidariedade Sosial Inkluzaun ba Likisa no Vise Ministra Estatal ba Bobonaru," Alexandrino tenik.
Maski iha redusaun OJE 2020 ba SEPS, Alexandrino espera nia sei kontaktu nafatin ho Primeiru Ministru Taur Matan Ruak, atu bele aloka orsamentu rezerva ruma ou kontizensia balu hodi apoiu vítima inséndiu no dezastre naturais.