Ideia Horta (parte 2), Xanana ne’ebé Hahú Frustasi ho Lideransa PM Taur

Husi sorin karuk ba liman los, eis Prezidente da Republika (2007-2012) Dr. Jose Ramos Horta, Atual PR, Francisco Guterres Lu Olo, Eis PR (2012-2017) Taur Matan Ruak, eis PR (2002-2007) Xanana Gusmao no eis PM (2002-2006) Mari Alkatiri foto hamutuk iha eventu ida iha palasiu do Governu iha tinan 2013 Husi sorin karuk ba liman los, eis Prezidente da Republika (2007-2012) Dr. Jose Ramos Horta, Atual PR, Francisco Guterres Lu Olo, Eis PR (2012-2017) Taur Matan Ruak, eis PR (2002-2007) Xanana Gusmao no eis PM (2002-2006) Mari Alkatiri foto hamutuk iha eventu ida iha palasiu do Governu iha tinan 2013 Foto Arkivu

Tempotimor (Dili)-Maske durante ne’e eis Primeiru Ministru no lider boot partidu CNRT Kay Rala Xanana Gusmão sei hatudu nafatin ninia “jeitu” hanesan la preokupa ho kondisaun ne’ebé governu Aliansa Mudansa ba Progresu (AMP) hasoru daudauk, maibé iha hanoin balun ne’ebé hatete katak Xanana sente frustradu tebes.

Tuir eis Prezidente Repúblika José Ramos Horta deklara, nia hatene daudauk ne’e Xanana frustradu ho governasaun AMP ne’ebé lidera husi Primeiru Ministru Tau Maran Ruak.

Tanba ida ne’e mak, Horta hatutan, Xanana hahú halai tuun-sa’e, hanesan fó bee ba Rusa iha Jaco no hamoos foer sira iha kapital Dili.

“Ha’u hatene Maun Xanana rasik frustrasi e nia frustrasi tebes ba ho governasaun ida ne’e. Nia (Xanana) terus, no nia sofre ba ida ne'e. Tanba ne'e mak nia halai ba Jaco, haree fó bee ba Rusa. Iha Dili laran haree nia hamoos foer sira iha mota-laran sira ne’e,” deklara Premiadu Nobel da Pas ne’e ba Tempotimor.com, foin lalais.

Horta hatutan, nia hatete mós katak durante ne’e Xanana lakohi halo intervensaun ba governu. Tan ne’e, Horta la aseita ho hanoin balun ne’ebé hatete durante ne’e Xanana mak hamriik iha kotuk hodi kria polemika entre AMP rasik.

“Nia (Xanana) lakohi interfere iha Governu. Balun hatete maun Xanana mak iha kotuk, ne’e la'e. Maun Xanana lakohi interfere iha Governu. Primeiru Ministru mak iha poder. Entaun nia la mete no la tama,” katak Horta.

Eis Prezidente Repúblika ne’e dehan, durante ne’e Xanana “fó” poder 100% ba PM Taur atu lidera governu, no Xanana foku ba projetu Tasi Mane no Greater Sunrise.

“(Xanana) Nia papel ita hatene, projetu tasi mane ho Greater Sunrise ne'ebé agora la'o daudaun. Projetu sira ne'ebe importante teb-tebes, entaun nia fó poder 100% ba Primeiru Ministru (Taur). Mais ha’u rona, nia (Xanana) mós hahú frustrasi maka'as loos,” afirma Premiadu Nobel da Pas ne’e.

Rate this item
(2 votes)
Last modified on Thursday, 19 December 2019 14:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.