Hafoin PR Lu Olo deside pendente membru governu na’in sia, AMP mós halo reajen hodi la fó “lisensa” ba PR Lu Olo atu hala’o viajen ba rai li’ur. To’o ohin loron, pedidu PR Lu Olo atu hala’o viajen serbisu ba rai li’ur sempre hetan kontra husi AMP.

Impaktu husi la fó pose ba membru governu daet mós to’o interna AMP. Partidu CNRT no KHUNTO ne’ebé ninia membru la simu pose hahú akuza Partidu Libertasaun Popular ne’ebé lidera husi Taur Matan Ruak mak hetan liu benefisiu husi problema refere.

Kritika husi membru bloku AMP ida ba membru AMP seluk kontinua sulin, no nia huun mak bainhira deputadu AMP sira iha Parlamentu Nasionál (PN) kritika no ameasa atu vota kontra proposta Orsamentu Jeral Estadu (OJE) 2020 ne’ebé governu ne’ebé sira apoiu aprezenta. Ho nune’e, ikus mai, PM Taur deside hodi retira proposta OJE 2020 husi PN.

Ba entre AMP ne’e, eis Prezidente Repúblika José Ramos Horta hatete, AMP daudauk ne’e hasoru problema konsultas.

“Situasaun seluk ida governu hasoru mak mosu problema konsultas, ou klima iha AMP laran rasik ke ita haree sira kritika-malu hahú kedan fulan ruma liu ba, semana ruma liu ba. Elementu balun husi Bankada KHUNTO, kritika Primeiru Ministru, ke Primeiru Ministru ba reuniaun semana-semana ho Pezidente Republika maibé la rezolve problema fó posse ba membrus AMP nian (membru governu pendente),” deklara Horta liu husi intervista ho Tempotimor.com, (17/12).

Problema seluk, tuir Horta, aleinde inkapasidade governu hodi ezekuta OJE 2019 ne’ebé la to’o porsentu 70, tanba mós governu karik la halo konsulta ho bankada AMP iha PN molok lori OJE 2020 ba PN.

“Governu rasik halo problema boot liu tan, kuandu laiha kapasidade atu ezekuta orsamentu e husu orsamentu ida ke boot liu tan, halo ema hotu-hotu hakfodak.”

“Depois lori orsamentu ba parlamentu parese ke la halo konsultas ho bankadas. Liu-liu bankada CNRT ke boot liu iha koligasaun,” dehan Horta.

Horta hatutan, koligasaun ne’e iha mak governu iha, no bainhira partidu boot liu iha koligasaun, hanesan CNRT, la tane governu, sei mosu problema ba governu rasik.

“Entaun ne’e mós mak ema kestiona, tanba sa mak ne’e akontese? See mak lideransa?, Lideransa klaru ke Primeiru Ministru (Taur). Portantu, ne’e iha impaktu ba Primeiru Ministru nia autoridade.”

Nia hatutan, bainhira governu aprezenta proposta OJE 2020 ne’ebé boot no CNRT deklara katak la apoiu orsamentu refere, ema hotu hakfodak.

“Agora parese ke sira prepara atu entrega orsamentu foun iha dia 19 de Dezembru. Mais halo konsultas ka la’e? Dialogu la’o daudaun ka la’e iha AMP nia laran? Preparasaun orsamentu ne’e ho partisipasaun bankada ka la’e?.”

Bainhira lori fila ba PN, Horta dehan, loloos presiza halo uluk konsulta entre membru bloku AMP no halo mós konsulta ho partidu opozisaun boot liu iha PN.

“Ha’u hatene, ha’u fiar ke Dr. Mari Akatiri ho elementu sira seluk iha FRETILIN, sira nunka hatete katak sira lakohi dialogu. Sira sempre hatete prontu dialogu, e tan basa mak la halo?. Primeiru Ministru la buka dialogu ho Dr. Mari Alkatiri, dialogu lori AMP nia naran. Dialogu ne’e la’os ho Taur Matan Ruak ka PLP nia naran maibé Taur Matan Ruak, Primeiru Ministru Governu AMP. Se la halo ne’e, mak orsamentu fila duni ba Parlamentu, bainhira mak sira debate no se bankada CNRT sei apoia ou sei kontra nafatin.”

Nia dehan, tinan 2019 besik remata ona, no TL kontinua hasoru problema ne’ebé ezije lideransa partidu sira, no ezije Xanana nu’udar lider nasional, atu halo inisiativa ruma par hadi’a governasaun.