MJ Carceres "Osan Menus Tuir Kapasidade Di'ak Liu"

 

Tempotimor (Dili)- Ezekusaun menus, Ministeiru Justica nia osan kua nune'e duni iha Orsamentu Jerál Estadu tinan fiskál 2020 ne'ebé prevé miliaun $19 ba Ministériu Justisa ne'e di'ak liu, tanba tuir kapasidede ministru nian.

 

"Redusaun ne'e razoavél teb-tebes, ha'u simu, tanba ita tau osan boboot mais laiha kapasidade ezekusaun mós hanesan de'it, di'ak liu tau osan naton ho ita nia forsa para ezekuta di'ak liu. Tanba osan ne'e la'os ba gasta de'it maibé gasta ba saida," dehan Ministru Justisa (MJ) Manuel Cárceres da Costa iha Palásiu Governu, Kinta (19/12/19)

 

Governante ne'e relata, orsamentu tinan 2019 atinji milliaun $21, maibé iha 2020 MJ hetan de'it milliaun $19, tanba liga ba kapasidade ezekusaun.

 

"Orsamentu tinan kotuk (2019) ba MJ ne'e milliaun $21 no tinan fiskál 2020 iha de'it milliaun $19, maibé laiha diferensa boot inklui la afeita ba programa sira iha 2020 nian, naran katak ita hatene gasta no hatene halo saida," afirma Cárceres

 

Maske kua orsamentu maibe tuir Ministru Justica katak sei la afeta programa prioridade iha MJ ba tinan 2020, tan ba MJ sei kontinua halo kapasitasaun ba majistradu judisiáriu sira, hodi sai juiz, sai prokuradór, advogadu no defensór publiku ne'ebé di'ak. Nia mos akresenta planu avansu ida mak tinan oin, MJ sei implementa planu emiisaun passaporte iha munísipiu ida-idak.