Tempotimor (Dili)-Deputada bankada Kmanek Haburas Unidade Nasional Timor Oan (KHUNTO) Olinda Guterres husu ba Xefe do governu atu hatama mos naran Ministru Obras Públika (MOP) ba iha lista remodelasaun, tanba inkapasidade.
"Remodelasaun ne'e mak señor Primeiru Ministru (PM) Taur Matan Ruak ko'alia hela no deputadu balun mós dehan remodelasaun sei iha duni, bele-bele mosu tanba ita haree de'it agora, Ministru MOP de'it nia la halo kontinuasaun ba projeitu sira ne'ebé maun boot Xanana rai hela," dehan deputada Khunto Olinda Guterres iha PN, Sesta (20/12/19).
Tuir Deputada ne'e, inkapasidade Ministru Obras Publika tan ba projetu balun besik finaliza ona maibe la iha aksaun kontreta husi ezekutivu.
"projetu balun hela pursentu 25% no 15% para remata, (la) selu ema, afetadu (setor Privadu) sira nia osan, maibé nia (Ministro Obras Publika) halo (Projetu) foun fali," esplika deputada Khunto Olinda Guterres.
"Ministru ida hanesan ne'e, tanba inkapasidade, ne'e la'os ha'u ko'alia de'it, mais ema barak husu atu marka audiénsia mós labele, tenke ba fali asesór. Asesór atu halo saida, momentu nia sai ministru, ha'u rasik telefone nia, mais nia la simu," Olinda hateten.
Fundadora Khunto fo lembra fila fali Primeiru Ministru kona ba pontu ida husi rezolusaun konferensia AMP iha Tibar mos husu atu remodelasaun ba VIII governu, tanba ministru sira ne'ebé inkapasidade tenke troka, la'os MOP de'it maibe bele inklui mos ministru no Sekretáriu Estadu sira ne'ebé laiha kapasidade nia ezije atu hasai hotu, tanba iha konferénsia Tibar Khinto apoiu ba remodelasaun.