Tempo Timor (Dili) - Deputada AMP husi bankada KHUNTO, Olinda Guterres alega inkapasidade membru governu AMP balun mosu tan ba deskonfia sosa de'it grau maestradu nune'e uza asesor barabarak iha sira nia kna'ar nu'udar membru governu.
"Balun la'os grau maestradu (S2) maibé dehan (S2), ba sosa de'it iha rai li'ur ne'ebá mós mai dehan S2," alega Deputada Olinda Guterres iha Parlamentu Nasional (20/12).
Maske deputada ne'e la temi naran membru governu ida ne'ebe maka nia refere ba sosa S2 maibe nia deskonfia kapasidade membru governu balun iha AMP ne'ebe hetan titulu barak mas iha realidade serbisu barak liu asesor sira maka halo fali.
"Hatudu faktus, o kuandu S2, S3 ne'e la presiza uza asesór tolu ka haat dala ida, kuandu o S2 ka S3, tanba uza ona asesór tolu ba leten ne'e inkapasidade," nia realsa.
Nune'e duni hanoin remodelasaun ne'ebe hasai iha konferensia AMP iha Tibar ne'ebe mak sai ona konsumu publiku, tuir deputada ne'e "tenke iha" no membru Governu S2 ho S3 sira maka inkapasidade.
"Ami apoiu remodelasaun, tanba atu dada loos ministru sira ne'ebé inkapasidade no lahatene halo serbisu," dehan nia.
Deputada ne'e mos ezije atu governu hatu'ur padraun ida kona ba uza asesor internasional nian.
"pelumenus ministru ida, asesór rua ne'e naton, tanba tékniku ba ita nian iha, Só ba buat ida atu hakerek Ingles no Portugés ne'e mak ita presiza. Agora timoroan barak nusa la uza, bainhira timoroan bele ona, ne'e lalika uza ona asesór internasional," nia sujere.