Iha okaziaun ne'e, SEFOPE sujere atu Konkursu Nasionál ba Aptidaun (KNA) tinan ida, tenki realiza dala rua. Ho nune’e, setór privadu sira bele haree barak liután kapasidade hosi Sentru Formasaun ba joven sira-nia esperiensia ne’ebé hetan ona.

Tuir SEFOPE, bainhira realiza fali konkursu hanesan ne’e, ekipamentus ne’ebé sei uza durante konkursu, lori de’it husi Sentru Formasaun.

“Ho ida ne'e, sira bele aprezenta ekipamentu saida maka sira presiza halo. Nune’e, governu liuhusi SEFOPE bele fó apoiu,” Julião esplika.

Joven sira, tuir Julião, kuandu tuir kursu hotu lakohi implementa esperiénsia ne’ebé sira hetan.

“Tanba ne’e, bainhira hotu husi formasaun atu bele implementa matenek ne’ebé iha hanesan soldadura, bele loke fali ofisina tuir kapasidade ne’ebé iha,” nia hatete.

Julião mós espera, husi realizasaun konkursu ne’e, bele sai hanesan sasukat ba joven sira ne’ebé tuir formasaun iha Sentru Formasaun sira, liuliu iha área konstrusaun sivíl, otelaria no auto-mekániku.