Seremonia entrega Sentru Formasaun DIT-Baukau ba estadu ne'e, tanba iha dezentendimentu entre funsionáriu iha Sentru Formasaun DIT-Baukau ho DIT nu'udar instituisaun ne’ebé hamahan ba Sentru Formasaun ne’e. 

“Meius ne’ebé DIT halo, atu bele aproxima funsionariu sira hodi fó formasaun ne’ebé di’ak ba joven sira, maibé la konsege intende malu. Tanba fasilidade sira ne’e, estadu nian. Entaun DIT foti desizaun entrega filafali ba iha estadu liuhosi SEFOPE,” hatete Reitór DIT, Álvaro Menezes.

Iha fatin hanesan, SEFOPE hateten sei buka mekanismu ne’ebé di’ak hodi bele hahú funsiona filafali Sentru Formasaun ne’ebé iha. Tanba, tuir SEFOPE, estadu nia pólitika maka atu kontinua kapitaliza rekursu humanu iha nasaun ne’e.

SEFOPE agradese ba boa vontade, energia no tempu tomak ne’ebé estabelese sentru ida ne’e, no komprimitidu katak sei reativa filafali sentru ne’e ho di’ak.

Iha tempu hanesan, SEFOPE mós fahe sertifikadu ba dosenti DIT ne’ebé tuir ona formasaun Smart PLS iha DIT, durante semana rua.