Iha lansamentu, SEFOPE husu atensaun ba kandidatus sira atu didiak no kuidadu ho sira nia saúde no fíziku, atu nune'e bele ultrapasa rekezitus ne'ebé iha ona.

“Ho ida ne'e, imi bele hetan valór ida ne'ebé di'ak no bele hetan opportunidade, hanesan maluk timoroan sira seluk ne'ebé agora servisu ona iha Austrália,” Julião hatete.

SEFOPE mós fó korajen ba kandidatus sira bainhira ba servisu iha ema nia rai, bele hetan netik osan ruma, hodi ajuda ekonomia familia no ajuda kresimentu ekonomia iha familia nia laran.

SEFOPE espera, kandidatus hamutuk 866 pesoas ne'e, bele liu hotu iha teste refere no bele hetan opportunidade.

Iha fatin hanesan, Prezidente RAEOA interinu, Arsenio Bano salienta, oportunidade nunka mai dala rua. Ho ida ne'e, nia husu joven sira atu kontinua prepara an no labele envolve iha kualker aktus krime, hodi prejudika sira-nia dezempeñu no lahetan oportunidade ba hadi'a sira-nia vida ekonomia.