tempotimor.com (DILI) - Setór edukasaun liuliu ensinu superior to'o agora seidauk iha politika ne'ebé klaru. Tanba ne'e, seidauk bele produs rekursu umanu ne'ebé preparadu ba merkadu traballu.
Deputdu Bankada Fretilin, Francisco M. Branco hatete, bainhira setór edukasaun Timor-Leste la'o nune'e beibeik maka sei sai bomba alarma ne'ebé bele rabenta iha tempu ikus mai.
Deputadu opozisaun hato'o deklarasaun ne'e bainhira Ministru Ensinu Superior Siensia no Kultura (MESSK) halo audiensia publika ho Komisaun G PN, iha Uma Fukun PN, Segunda (6/1).
Tuir nia, presiza iha politika ensinu superior atu nune'e garante kualidade edukasaun di'ak ba estudante sira.
"Knar Ita boot nian (Ministru Ensinu Superiór) relasiona ho dezenvolvimentu ba kapitál umanu ba ita-nia rai ita presiza defini loloos roll ensinu superiór ninian," dehan Branco.
Graduadu ensinu superiór sira pelumenus tenke domina iha siénsia no teknolójia tanba Timor-Leste iha prosesu konstrusaun presiza tebes atu forma rekursu umanu.
"Ita presiza forma rekursu umanu atu domina iha siénsia no teknolójia, maibe ita forma fali rekursu umanu hanesan bomba alarma ne'ebé sei rabenta iha tempu mai," dehan Branco.
Situasaun ne'e sai prekupasaun boot ba ema hotu. Tanba ne'e, Estadu Timor-Leste presiza iha konsensu nasionál ida, nune'e labele deit iha graduasaun maibe la domina siénsia no teknolójia. (*)