Kritika maka’as husi deputadu PLP Sabino Soares “Guntur” ne’e relasiona ho aujensia Ministru Fidelis iha audensia ba proposta Orsamentu Jeral Estadu (OJE) 2020 ho komisaun sira iha Parlamentu Nasionál.

Lee mós: Lei Garante Ministru Fidelis “Falta” iha Audensia ho Komisaun PN

Ba asaun Ministru Fidelis ne’ebé assume pasta nu’udar Ministru Reforma Lejislativu Asuntu Parlamentar (MRLAP), Guntur konsidera nu’udar asaun ne’ebé hatudu katak ministru ne’e laiha moral no laiha responsabilidade.

"Sente tirste tanba ema sira ne'ebé mai husi partidu PLP mak ba envolve iha Governu halai sai husi responsabilidade tomak ne'ebé mak povu fó liu husi partidu PLP, no ida ne'e dehan katak ema ne'e laiha moral, laiha responsabilidade ba kompeténsia sira ne'ebé mak Governu no Primeiru Ministru fó,” dehan Guntur ne’ebé assume mós kargu nu’udar Vise Prezidente Komisaun Politika Nasionál PLP ne’e, iha PN, Segunda (13/01).

Tuir Guntur, membru governu sira tenke marka prezensa iha audensia ho deputadu sira tanba membru governu sira mak iha kompetensia atu esplika programa no politika ne’ebé nia iha.

“Ne’e la’os audiénsia normal ne'ebé ministru atu ba tuir nia hakarak de'it," dehan Deputadu ne’e.

Nia afirma, audensia ba proposta OJE ho komisaun PN nu’udar prioridade ida tan ne’e membru governu sira tenke partisipa.

“Tanba saida mak la marka prezensa? se cuti ka lisensa anual, antes ne’e tenke tama ona, maibé se ministru la tama mak fó fali kompeténsia ba diretor sira, ida ne'e konserteza viola ona regra kompeténsia irarkia governu nian, tanba ida ne’e kompeténsia ministru nian par ministru mak mai esplika programa sira,” dehan Guntur.