Iha inisiu fulan Janeiru tinan ne’e, Komisaun sira iha Parlamentu Nasionál (PN) hahú audensia ho kada ministériu hodi hatene di’ak liu tan pedidu orsamentu husi kada ministériu no mós sira-nia politika no progama. Ida ne’e nu’udar prosesu normal ida molok tama ba debate OJE iha plenaria PN.
Maibé, durante audensia ne’e iha membru governu balun ne’ebé la marka prezensa tanba sei pasa ferias hela.
Tuir dadus ne’ebé Tempotimor.com rekolla, membru governu ne’ebé la marka prezensa iha audensia ho komisaun sira iha Parlamentu Nasionál mak Ministru Fidelis Leite Magalhaes ne’ebé okupa kadeira ministru tolu mak hanesan Ministru Reforma Administrativa Asuntu Parlamentar, Ministru Koordenadór Asuntus Ekonomikus (MKAE), no Ministru Turizmu, Komersiu no Industria (MTKI); Ministru Salvador Pires ne’ebé okupa kargu Ministru Obras Públika; no Ministru Manuel Carceres ne’ebé kaer pasta nu’udar Ministru Justisa.
Molok ne’e mosu ona kritika barak husi deputadu sira, inklui deputadu husi bankada ne’ebé apoiu governu. Deputadu husi Bankada Partidu Libertasaun Popular ne’ebé ministru na’in tolu ne’e reprezenta ba, hato’o mós kritika maka’as.
Lee mós: Kritika husi Deputadu PLP: Fidelis, Ministru Imoral
Iha debate jeneralidade proposta OJE 2020 ba loron dahuluk, deputadu husi bankada opozisaun, FRETILIN, kestiona hikas aujensia membru governu sira durante audensia ho komisaun parlamentar.
Deputadu Bankada FRETILIN, Joaquim dos Santos, liu husi ninia intervensaun ba aprovasaun giaun hatete OJE 2020 ho karater urjensia la subtansial ona.
"Dehan pedidu urjensia (mais) Ministru sira mós ba tiha férias. Purtantu, urjensia ne’e ulun tuun, ain sa’e tiha ona," dehan Joaquim.