Deputada Maria Angelica Rangel liu husi ninia intervensaun iha plenaria PN hatete, leitura PM Taur ne’ebé sita millaun $61 ba konstrusaun postu saúde ne’e sala no bosok povu.

"$61 millaun ha’u buka iha livru infraestrutura laiha no buka iha livru 2 planu asaun mós laiha, iha livru 2 planu asaun ne'e ha’u so hetan dei't mak $1.9 atu tau iha kapital dezenvolvimentu ministeriu saude nian, $61 milloes ne'ebé eskrita ohin halo leitura ne'e katak ita-boot (PM) mai bosok povu, tanba iha livru laiha," deklara Angelica iha PN, Kuarta (15/1).

Bainhira montante osan ne’ebé PM temi ne’e mak hakerek sala, Angelica dehan, ministru no sekretariu estadu sira ne'ebé tutela tenke demita an.

"Asesor sira haruka sai, tanba hakerek sala Primeiru Ministru mai halo leitura $61 milloes atu destinasaun konstrusaun ba postu saude iha teritoriu laran tomak, ne'e signifika dokumentus formal ida ne'e mai bosok povu, se kazu nune'e duni, ema sira iha ita-boot nia sorin ne'e haruka demite an, tanba iha livru 2 planu asaun laiha, signifika mai bosok iha uma fukun parlamentu nasional," deklara deputada ne’e.