Deskonfia Konspirasaun iha PN, 'Eis-Komandante' Tuun Hakalma

situasaun plenaria Parlamentu Nasional (15/01) situasaun plenaria Parlamentu Nasional (15/01) Foto suplai

Tempotimor (Dili) - Diskusaun Orsamentu Jerál Estadu (OJE) tinan fiskál 2020 loron daruak hahú ho konflitu. Deputadu bankada governu no opozisaun ataka malu tanba liafuan 'bosok-teen'.


Antes ne'e, deputadu sira iha PN krítika malu relasiona ho intervensaun Deputada FRETILIN, Maria Angélica hasai liafuan 'bosok-teen', ne'ebé kestionadu husi Deputadu PLP, Cornelio Gama 'L-7'.

Liafuan bosok-teen ne'e hasai iha loron dahuluk diskusaun OJE, Kuarta (15/1), maibé iha loron ne'e, deputadu bankada governu la foti reasaun. Nune'e, foin kestiona fali iha loron daruak, Kinta (16/1).

Ne'e duni, partidu opozisaun FRETILIN, deskonfia mosu ona konspirasaun entre deputadu bankada governu nian.

Prezidente Bankada FRETILIN, Aniceto Guterres, deskonfia iha konspirasaun tanba bainhira deklarasaun husi Maria Angélica, horiseik, ((Kuarta (15/1), laiha deputadu ida husu bankada governu mak halo defeza-de-onra.

"Sá konspirasaun mak daudaun ne'e halo?," tenik nia, iha Uma Fukun PN, Kinta (16/1).

Haree ba situasaun ne'e, Primeiru Ministru, Taur Matan Ruak, nu'udar eis-komandante F-FDTL tenta hakalma deputadu sira.

"Ha'u hanoin horikalan ita toba mehi di'ak ruma karik, tanba ita-nia debate di'ak loos," dehan Xefe Governu.

Eis-Jenerál ne'e rasik la kestiona deklarasaun deputada Maria Angelica, tanba ne'e governu disponivel nafatin hodi kontinua halo diskusaun atu bele hetan lia-loos.

"Horseik ha'u aseita. Ha'u hanoin hotu tiha ona," dehan Primeiru Ministru.

Mezmu nune'e ho deklaraun husi PM Matan Ruak konsege hakalma tensaun krítika husi deputadu sira, nune'e plenária kontinua kedas ba debate OJE. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.