Deputadu Bankada CNRT, Aderito Hugo da Costa hateten, projetu governu nian barak mak durante ne'e la la'o tanba falta kontrolu.
"Iha loron Domingu, hodibainrua, Ha'u ba Casait, fila mai haree obra ida iha Tibar atividade paradu no ekipamentu pezadu sira iha projetu ne'e la hatene ba hotu ne'ebé. Mas Ha'u simu informasaun ne'ebé kredibel tebes katak, ita iha problema jestaun iha governu", dehan nia, iha Uma Fukun Parlamentu Nasionál (PN), Kinta (16/1).
Tuir nia, la'ós projetu Tibar de'it mak paradu, maibé akontese mós ba kontratu prestasaun servisu konsultóriu superviziona ba projetu estrada nasionál diresaun Hera - Manatutu ne'ebé la'o hela.
Razaun hirak ne'e, nia dehan, governu la kumpre no la asegura kontratu sira ne'ebe la'o hela hodi atu fo konfiansa ba ajénsia finanseiru internasionál hanesan Japan International Cooperation Agency (JICA).
Ne'e duni, husu ba primeiru ministru atu bele tau konsiderasaun hodi hadi'a jestaun iha governu.
Nune'e, konfiansa kontinua ba sistema transferénsia akontabilidade orsamentu públiku ninian no mós ajénsia sira seluk mós kada tinan nafatin konfiansa ba sistema hodi fó doasaun.