Deputada Maria Angelica Rangel fó kritika ba Ministru Salvador tanba konsidera dadus ne’ebé ministru ne’e aprezenta la hanesan ho dadus ne’ebé molok ne’e Vise Ministru Obras Públika aprezenta iha audensia ho komisaun PN.

"Ministru ba tiha feriadu, la marka prezensa iha audensia ho komisaun, mai halo esplika iha Parlamentu Nasional kontaradis ho ita-boot nia Vise ne'ebé mai audensia ho ami, komisaun," dehan Angelica durante debate OJE 2020 iha Parlamentu Nasional, Sesta (17/01).

Iha Ministru Salvador nia esplikasaun kona-ba projetu Portu Tibar hatete katak MOP simu variasaun númeru lima (5) no trata tuir lei aprovizionamentu, no valor akumuladu husi projetu refere hamutuk millaun $5.

Bainhira Konsellu Ministru aprova no lori ba Tribunal das Kontas, Salvador hatutan, tribunal husu fali ariasaun númeru 1 to’o 6 no sira la hatene variasaun númeru 1 to’o 4 ne’ebé halo tiha ona pagamentu.

Ho nune’e, Salvador dehan, pagamentu refere invalid ona, tan ne’e husu tan audisional ho valor millaun $5 ho nune’e total osan ba projetu ne’e sa’e ba millaun $10.

“Ita iha purvolta millaun $1 ne’ebé labele selu tanba la hetan vistu husi tribunal das kontas,” dehan Ministru ne’e.