Iha enkontru refere, PM Taur husu ba membru governu sira atu kontinua serbisu hanesan baibain hodi hein governu foun mosu.
Sekretariu Estadu Komunikasaun Sosial (SEKomS) Mericio Juvinal "Akara" informa, membru governu hotu-hotu enkontru ho PM hodi simu orientasaun atu hala'o funsionamentu governu nian hanesan bai-bain.
"Ohin primeiru ministru bolu membru governu hotu-hotu hodi simu orientasaun atu hala'o serbisu hanesan baibain no membru governu tenke fó nafatin orientasun ba funsionariu sira atu serbisu hanesan baibain no tuir nia knar", dehan Akara ba jornalista sira hafoin hasoru-malu ho PM Taur iha palasiu governu.
Entretantu sekretariu estadu ne'e dehan, tanba proposta OJE 2020 la pasa, automatikamente governu tenke depende ba orsamentu duadesimu.
"Ohin primeiru ministru mós fó orientasaun ba ami katak, heree orsamentu duadesimu ho di'ak par bele to'o orsametu jeral estadu aprova", dehan Akara.
