"Impase polítika ne'ebé daudaun akontese iha ita-nia nasaun ne'e, tanba konsekuénsia husi ema nu'udar umanu nia-egoizmu ba sasán mundu nian hanesan podér no riku-soin", dehan Jenerál Lere, iha Kuartél Jerál F-FDTL, Fatuhada, Kinta (23/1).
Tuir nia, nasaun ne'e moris iha impase polítika naruk, tanba valór ne'ebé uluk kuda metin iha neon no fuan laran hanesan domin, lealdade nasionalizmu no pratritizmu ba nasaun ne'e hahu mihis ba daudaun.
Xefe Estadu Maiór F-FDTL ne'e esplika, aproveita situasaun polítika ataul, liga ba antesedente polítika nian, ema ne'ebé uluk rejeita ukun-aan, aproveita di'ak liu oportunidade hirak ne'e para imlementa polítika vingansa ka polítika fahe ukun.
Nune'e, Lere apela ba lider nasionál sira hanesan Maun Boot Kay Rala Xanana Gusmão, José Ramos Horta, Mari Alkatiri, Francisco Guterres Lú Olo, Taur Matan Ruak no sira seluk atu hanoin hikas fali ka halo reflesaun hodi kaer metin nafatin valór sira iha tempu rezisténsia, atu hanorin jerasaun foun sira no povu tomak.
Nia haree, preokupasaun lider sira ba nasaun ne'e nafatin hela, maibé ladún másimu tanba intrese partidaria mak domina ona.
Nune'e, tuir Lere, halo diálogu ida hodi hetan konsensu nasionál para bele fó liman ba malu, atu fó solusaun ba problema impase polítika nasionál ne'ebe oras ne'e hasoru, atu povu labele sai vítima nafatin. (*)