Iha diálogu loron daruak nian, iha Sesta (24/1), ba dahuluk sei hasoru uluk Partidu Libertasaun Populár (PLP) ne'ebé lidera husi atuál Primeiru Ministru, Taur Matan Ruak.
Tuir fali, Prezidente Repúblika mós sei enkontru ho partidu segundu mais votadu Frente Revolucionária Timor-Leste Independente (FRETILIN).
Reuniaun ne'e, Prezidente Repúblika sei rona solusaun konkretu ba situasaun polítiku-konstitusionál husi dirijente partidu no lider bankada sira.
Nune'e, diálogu ho Partidu Demokrátiku (PD) no koligasaun Partidu Unidade Dezenvolvimentu Demokrátiku (PUDD) sei marka fali ba tempu seluk.
Tuir planu, diálogu no konsultasaun sei kontinua la'o to’o 4 Fevereiru 2020.
Prezidente Repúblika, Francisco Guterres Lú Olo, iha Kinta (23/), hahú rona solusaun polítika ba situasaun polítika-konstitusionál atuál husi dirijente partidu polítiku no xefe bankada Congresso Nacional de Reconstrução de Timor-Leste (CNRT), Klibur Haburas Unidade Timor Oan (KHUNTO) no koligasaun Frente Mudansa/ União Democrática Timorense (UDT).
Prezidente Repúblika informa ba dirijente partidu polítiku no xefe bankada sira katak, hafoin OJE 2020 la pasa, presiza Timoroan hotu nia unidade atu hakotu situasaun polítika ne’e atu labele hada'et liután ba beibeik.
"Situasaun polítika ne’ebé ohin loron Timor-Leste enfrenta nu’udar problema ita hotu ninian. Tanba ne’e, ema hotu-hotu nia hanoin sei kontribui ba solusaun", dehan nia.
Prezidente Repúblika fiar katak, laiha partidu polítiku ida mak iha intensaun aat ba nasaun ida ne’e no Timoroan hotu-hotu serve ba rai ida ne’e. (*)