"Ha'u-nia esperansa lakohi atu iha eleisaun antesipada," dehan Sekretáriu Jerál FRETILIN, Mari Alkatiri, iha Palásiu Prezidensiál, Bairru-Pité, Sesta (24/1).

FRETILIN la konkorda ho eleisaun antesipada tanba mandatu Prezidente Repúblika nian iha períodu ida halo kedas eleisaun antesipada dala rua no povu mos kole ona ho eleisaun.

Mari hatete, FRETILIN sempre nakloke no nunka rejeita atu halo diálogu ho partidu sira seluk.

Maski nune'e, partidu polítiku sira agora daudaun sei fó prioridade ba diálogu ho Prezidente Repúblika.

Alkatiri fo ezemplu, Partidu FRETILIN agora daudaun hanesan katuas bonitu ne'ebé partidu sira seluk buka atu ko'alia.

Antes ne'e, Partidu bloku governu Partidu Libertasaun Populár (PLP) foti pozisaun atu entrega hikas ba Prezidente Repúblika Tuir Konstitusaun.

"Solusaun saída deit mak Prezidente Repúblika deside, ami hotu partidu PLP konkorda no apoiu," dehan Prezidennti interinu PLP, Abrão Freitas "Mate Restu".

Nune'e, loron ida antes, Sekretariu-Jerál CNRT, Francisco Kalbuadi Lay, iha diálogu ne’e entrega karta eskrita husi Prezidente CNRT, Xanana Gusmão, ko’alia kona-ba solusoins sira ba Prezidente Repúblika.

Sekretariu-Jerál CNRT entrega karta eskrita no husu atu Prezidente Repúblika halo leitura uluk hodi marka fali loron seluk ba diskusaun konteúdu karta.

Francisco Kalbuadi hato’o partidu CNRT ninia disponibilidade atu partisipa iha diálogu tuir mai ne’ebé Prezidente Repúblika deside.

Maske nune’e, Francisco Kalbuadi Lay hateten katak desizaun hotu-hotu ne’ebé Prezidente Repúblika foti, partidu CNRT sei submete.

Nune'e, Prezidente KHUNTO, Armanda Berta, husu ba Prezidente Repúblika atu na’in ulun sira, liuliu lider rezisténsia sira bele tur hamutuk halo diálogu buka solusaun ba nasaun nia vida.

Tuir Armanda Berta, iha situasaun difísil tebes iha luta hasoru okupasaun Indonézia, na’in ulun sira bele tur hamutuk rezolve problema tanba ohin loron labele. Tanba ne’e, diálogu entre na’in ulun sira sai fatór determinante ba solusaun problema.

Entretantu, Prezidente Interinu Frente Mudansa, Igidio de Jesus no Sekretáriu Jerál UDT, Francisco David Xavier Carlos, ba Prezidente Repúblika hato’o solusaun konkretu atu na’in ulun sira kontinua halo diálogu no hili governu inkluzaun nu’udar mak dalan di’ak liu atu hakotu situasaun polítika atuál.

Hafoin hato’o sira-ninian solusaun, Koligasaun UDT/Frente Mudansa entrega opiniaun eskrita ba Prezidente Repúblika. (*)