"Susar maka istória polítika hatudu, ohin aliadu, aban inimigu fali", dehan Sekretáriu Jerál FRETILIN, Mari Alkatiri, iha Palásiu Prezidensiál, Bairru-Pité, Sesta (24/1).
Maski nune'e, la taka dalan atu hamosu koligasaun foun bainhira Prezidente Repúblika fó dalan, maibe tenke buka situasaun ida para kria konfiansa entre lider polítiku hodi hetan solusaun polítika no konsertasaun programa ba bem estar komun.
Biar hanesan ne'e, Partidu FRETILIN rasik seidauk estabelese komunikasaun ruma ho partidu polítiku sira seluk.
"Ha'u seidauk hasoru nem PLP, CNRT no KHUNTO, depende vontade polítika husi parte hotu-hotu, la depende de'it ba FRETILIN," dehan Alkatiri.
Nia hatutan, uluk iha ona koligasaun ba malu maibe ikus mai sobu no halai sai.
"Uluk hamutuk ona (mas) la hatene sé mak halai abandona sé. Ha'u la hatene!" akresenta Mari.
Sekjer FRETILIN ne'e dehan, konsensu entre partidu polítiku sira signifika hotu-hotu tuur no iha sentidu responsabilidade hodi hateke ba oin ho ajenda klaru ba programa servisu komun. (*)