Embaixadór Ilidio Ximenes, promete sei kontinua kooperasaun servisu ho Governu Japaun nune'e sei foku liu ba área siénsia teknolójia.
"Ha'u nia planu ba oin mak sira (Japaun) iha área teknolójia oinsá bele liga iha sentru formasaun sira," dehan nia, iha Palásiu Prezidensiál, Bairru-Pité, Tersa (28/01).
Tuir Eis-Sekretáriu Estadu ne'e hatete, teknolójia ne'ebé Japaun iha modernu tebes no bele estabelese la'ós de'it iha universidade, maibé iha sentru formasaun sira ne'ebé Governu kria.
Maski nune'e, Ilídio sei kontinua hametin kooperasaun ne'ebé antes ne'e Timor-Leste ho Japaun establese ona, hanesan seguransa, edukasaun, agrikultura no infraestrutura, inklui kooperasaun foun kona-ba atu transfere traballadór timoroan ba Japaun.
Embaixadór Ilídio Ximenes rasik hetan pose husi Prezidente Repúblika, Francisco Guterres Lú Olo liuhusi dekretu 21/2020. (*)