Iha Tersa (28/01) dadeer, Prezidente Repúblika Francisco Guterres Lu Olo fó posse ba embaixadór hirak ne’e hodi hala’o misaun diplomatika iha rai li’ur. Aleinde misaun ne’e, iha misaun importante seluk mak buka mós serbisu ba Timor-oan sira.
Embaixadora ba Singapura, Maria Natalia Guteres Viegas Carascalão hatete, nu’udar embaixadora iha Singapura, nia sei buka mós dalan hodi oferese kampu serbisu ba Timor-oan sira iha nasaun ne’ebé nia haknar aan ba.
"Ami mós tenke tau-matan ba situasaun komunidade Timor-oan nian hodi bele buka tan bolsu estudu no fatin serbisu ba joven sira hanesan mós ho nasaun sira hanesan Koreia, Australia, Japaun no seluk tan, ne'e mak atu hala'o iha knar ida ne'e," dehan Natalia iha palasiu governu, Tersa (28/01).
Natalia dehan, nia simu ona orientasaun husi Primeiru Ministru Taur Matan Ruak atu hala’o serbisu ho di’ak, ho responsabilidade, dignidade no lealdade.
Iha fatin hanesan, Embaixadór TL ba Reinu Unidu no Irlandia Norte, Gil da Costa promete sei halo promosaun ba TL iha nasaun ne’ebé nia serbisu ba.
"Ita-nia governu agora esforsu atu diversifika ekonomia, tanba ne'e iha ami-nia misaun balu mós atu atrai investor sira par bele mai dudu ita-nia ekonomia ba oin," dehan nia.