Prezidente PD, Mariano Assanami Sabino hatete, modelu ne'ebé di'ak atu hakotu impase polítika mak hanesan daudaun Prezidente Repúblika, Francisco Guterres Lu Olo halo.
"PD nia-hanoin dialogu ne'e instrumentu kultural ida para depois eleisaun remata sempre iha diálogu. Balun iha opozisaun balun iha ukun, mas labele depois eleisaun remata ona ita sai inimigu fali ona," tenik nia, iha Palásiu Prezidensiál, Bairru-Pité, Kuarta (29/1).
Tuir Assanami, hanoin hanesan iha asuntu bee moos, povu nia moris, ekonomia no veteranu, labele iha palku leten de'it maibé tenke tau ba asaun bainhira ukun.
"Tuun husi palku leten ne'e ida nia-hanoin diferente ona," dehan nia.
Problema sira ne'ebé Timor hasoru, tuir PD, importante liu mak povu nia moris. Tane aas asuwa'in sira nia luta ba ukun-aan, inklui dependénsia ekonomia ba petro dollar.
Nune'e, diálogu para tau hanoin hamutuk oinsá mak buka dalan di'ak hanesan ekonomia sustentavel atu labele depedente ba mina-rai, inklui problema globál hanesan moras no ambiente.
"Ne'e presiza Timor-Leste buka malu para tau ideia hamutuk Timor-Leste ba oin," dehan Assanami.
Ajenda diálogu Prezidente Repúblika, Francisco Guterres Lu Olo, ho partidu polítiku kontinua ho PD no PUDD. (*)