Deputadu Bankada FRETILIN, António Benevides, husu Ministra Saúde, labele lori orsamentu duadesimu atu sai fali razaun atu labele foti asaun ruma kona-ba prevene Virus Corona tama mai Timor-Leste.

"Ita la'o ho de'it osan duadesimu, maibé ha'u espera embora la'o ho duadesimu osan labele sai fali razaun atu ita labele halo servisu ho efetivu hodi proteje ita-nia sidadaun sira husi virus Corona", dehan nia, iha Uma Fukun PN, Segunda (3/2).

Nia afirma, presiza buka meiu para bele halo preparasaun no antesipa ho situasaun virus Corona ne'ebé sai preokupasaun boot ba mundu, inklui Timor-Leste.

"Bele antesipa kedas ka halo preparasaun hodi kontrola iha fronteira atu bele hatene virus ne'e karik tama mai Timor", dehan António.

Deputadu ne'e akresenta, labele foti razaun orsamentu. Maski duadesimu la sufisiente mós tenke buka dalan para bele halo preparasaun hodi prevene virus ne'e.

Informasaun ikus liu, Vitima ne'ebé mate tanba virus Corona, to'o Domingu (2/2), hamutuk ema na'in 316 lakon vida iha Xina.

Konforme sita husi CNN, ema ne'ebé daet husi virus Corona liu ona 16.600.

Too agora iha nasaun liu 20 maka hetan ona infesaun ba virus ne'e. (*)