Husi prosesu hirak ne'e maioria husi ema sira ne'ebé hetan konvite ba dialogu, hotu-hotu entrega ba desizaun Xefe Estadu.
Hanesan soru-mutu ho Centro Estudo ba Pás no Desemvolvimento (CEPAD), organizasaun ne'e sujere oinsá Prezidente Repúblika foti desizaun ne'ebé sei la fó prejuizu ba Estadu no Povu.
"Saida de'it mak Prezidente Repúblika deside sei bele hetan solusaun di'ak ida. Hamenus tiha todan ne'e liuhusi formasaun governu ne'ebé mosu hein katak, liu husi konsulta ida ne'e, governu mós labele todan, labele mahar, labele bokar, atu nune'e hatan de'it ba prosesu tinan rua nian, ho kualidade, ho konsentrasaun, atu bele lori ita sai husi situasaun krítiku," dehan Diretór Ezekutivu CEPAD, João Boavida, iha Palásiu Prezidensiál, Bairru-Pité, Kuarta (5/2).
Nia dehan, servisu CEPAD iha baze mak halo nota katak impasse polítika laiha hanoin di'ak ba povu.
Nune'e, situasaun ne'ebé iha, buka oinsa mak buat ida agora aat daudaun ne'e, labele todan liu ba ema hotu.
Pontu espesífiku tuir Boavida, kabe ba Prezidente Repúblika mak iha kompeténsia atu fó sai bainhira rona entidade hotu-hotu nia hanoin. (*)