Ministru Transporte no Telekomunikasaun, José Agostinho hatete, la'o ho orsamentu duadesimu la konsege estende funsionáriu 23, tanba kapasidade finanseiru la sufisiente.

Aleinde ne'e, la estende funsionáriu kontratadu sira-nia kontratadu tanba akordu servisu remata ona. 

Nia esplika, bazeia ba estatuta funsionáriu nian kontratu remata ona iha 30 Dezembru 2019.

Nune'e, atu estende ka lae depende fali ba avaliasaun dezempeñu hodi hatene rezultadu oinsá.

Nia hatutan, iha razaun balun atu estende bazeia ba fatin servisu nian katak, fatin servisu ne'e sei presiza sira ka lae. Kuandu nesesidade servisu la presiza ona konserteza kontratu tenke hotu, maski ho rezultadu valór dezempeñu ne'ebe di'ak.

"Razaun balun mós kapasidade finanseiru, dadaun la'o ho duadesimu entaun orsamentu la sufisiente para responde ba direitu ajente kontratadu sira nian, entaun labele estende," tenik nia.

Ministru ne'e akresenta, problema hirak ne'e sai preokupasaun, tanba ne'e nafatin esforsu para fó solusaun ne'ebé bele armoniza situasaun iha rai-laran.