Maske identifika funsionariu kontratadu ZEESM ho kartaun partidu politiku, maibé J.Luis deside hodi estende sira-nia kontratu.
"Funsionariu kontratadu ne'ebé horiuluk tama serbisu ho kartaun, ha'u rona buat ne'e ha'u hatene, maibe tanba de'it ne'e asuntu estadu presiza iha kontinuidade, respeitu mós povu Oekusse, ami dehan mezmu tama ho kartaun maibé ita extende, ami labele hasai ema tanba tama ho kartaun," dehan J.Luis iha nia knar fatin, Farol, Dili, Kuarta (05/02).
Tuir nia, serbisu ba dezenvolvimentu iha Oekusse la'os partidu nian, maibé serbisu ba estadu, tan ne'e presiza uza politika ne'ebé di'ak hodi garante.
"Hakarak hatete ami extende funsionariu kontratadu 700, funsionariu kontratadu ne'e par ke abanbairua hamutuk ho funsaun publika par halo prosesu rekrutamentu ida atu ita bele valoriza ema-nia kompetensia profisionais sein deskrimina partidu, relijiau ou buat ida, ne'e mak ami hakarak halo.".
"Ha'u lakohi temi kartaun ne'e husi partidu A ou B, maibé imi jornalista pasti hatene liu ha'u muito bem, ha'u lakohi tanba funsaun ha'u nian la'os atu dezfavorese fali partidu ida ne'e ka favorese fali partidu ida ne'eba, maibé ha'u hakarak halo buat ne'ebé di'ak ba povu Oekusse tomak, ha'u lakoi komenta tan ida ne'e, maibé ha'u hatene de'it ema balun tama tanba kartaun, ha'u lakohi hasai ema husi rai Oekusse tanba de'it tama ho kartaun," dehan J.Luis.
Maske ho situasaun sira hanesan ne'e, maibé, J.Luis dehan, prosesu dezenvolvimentu iha Oekusse daudaun ne'e la'o normal nafatin, salariu ba funsionariu sira no administrasaun la'o nafatin.
