Ema ne'ebé iha influénsia hakotu impase ne'e maka Xanana Gusmão, atual Prezidente Partidu Congresso Nacional Reconstrução Timor-Leste (CNRT).
Tuir akademista Universidade Nasionál Timor Lorosa'e, Vitor Soares katak, impase polítika ne'ebé la'o hela ne'e, ninia xave atu iha Xanana nia-liman.
"Kaer xave no hatene segredu nasaun nian iha ema ida de'it. Diálogu ne'e kuandu lider nasionál eis-titulár sira, inklui Xanana mak partisipa espera impase ne'e bele hakotu ona", dehan nia, iha knaar fatin, Kampus Kaikoli-Dili, Sexta (7/2).
Vitor hatutan, diálogu ne'ebé sei hala'o iha loron 10 Fevereiru 2020 entre lider nasionál sira maka sei determina impase polítika ne'e.
Akademista mos husu ba lider polítiku sira presiza rezolve lalais impase ida ne'e, tanba situasaun hirak ne'e povu ki'ik sira mak sai vitima.
Antes ne'e, iha enkontru ho Partidu CNRT, Prezidente partidu, Kay Rala Xanana Gusmão la marka prezensa. Tanba ne'e, Xefe Estadu 'fó tan oportunidade' atu partisipa iha enkontru iha lider istóriku nian.