Prezidente Partidu CNRT, Kay Rala Xanana Gusmão hateten, laiha hanoin atu hamutuk ho partidu seluk hodi forma governu tanba ba oin sei hasoru 'moru' tanba ninia membru sira ne'ebé nomeia sei kontinua rekuza husi Prezidente Repúblika, Francisco Guterres Lú Olo.

"Ha'u tenke dehan ba públiku katak CNRT sei la hanoin atu partisipa Iha Governu foun," dehan Xanana liuhusi GMN-TV, Sabadu (8/2).

Xanana Gusmão mos esplika razaun tanba saida CNRT lakohi partisipa iha governu, tanba konsidera no sente CNRT nia-membru sei la toma pose bainhira partisipa Iha governu foun no CNRT hanesan partidu koruptu.

Tuir nia, kuandu mosu governu foun Primeiru Ministru presiza tenke rezigna-aan, inklui Orsamentu Jerál Estadu (OJE) laiha, no dentru loron 60 Prezidente Repúblika tenke foti desizaun.

"Tuir ha'u nia hanoin Primeiru Ministru tenke rezigna-aan, ka orsamentu sei laiha ha'u hanoin iha 60 dias, konta husi 1 Janeiru (2020) Prezidente (Repúblika) tenke halo buat ruma, karik la hatene, disolve Parlamentu (Nasionál) hodi iha governu foun," dehan Xanana.

Entertantu Konstituisaun RDTL artigu 74, Prezidente Repúblika hanesan simbolu no garante estabilidade nasionál loke dalan ba Prezidente Repúblika atu rona hanoin tomak husi Partidu polítiku inklui entidade hotu.

Tuir ajenda konsultasaun Prezidente Repúblika sei kontinua,  iha Segunda (10/2), hodi rona hanoin husi lider nasionál, inklui Xanana Gusmão. (*)