Sekretáriu Jerál Partidu Demokrátiku, António Conceição 'Kalohan' hatete, enkontru entre lider nasionál sira rezulta desizaun ne'ebé pozitivu no nakloke hodi fo oportunidade partidu sira buka malu antes ba eleisaun antesipada.
"Pozitivu tanba buat ne'ebé sira tau ne'e nakloke, hotu-hotu konsidera katak eleisaun antesipada ne'e la'ós dalan ne'ebé labele halo, maibé mós la'ós dalan ne'ebé tenke primeiru," dehan nia, iha Parlamentu Nasionál, Tersa (11/2).
Nia hatutan, lider sira tetu katak ba vida nasaun ba povu nian tenke tuur hamutuk atu ko'alia.
"ida ne'e fó oportunidade atu partidu polítiku sira bele ko'alia ba malu, ne'e pontu ne'ebé pozitivu tebes," hatutan Kalohan.
Kalohan konsidera hanoin ne'ebé husi Prezidente Repúblika mos tetu tebes ba situasaun ne'ebé lao ona tinan rua no hakarak estabilidade ba povu atu povu bele halo atividade moris iha situasaun neebe hakmatek. (*)