Sekretáriu Jerál PD, António Conceição 'Kalohan' hateten, Partidu FRETILIN no CNRT tenke inisia uluk liuhusi dalan buka-malu, nune'e hakotu ona impase polítika ne'ebé akontese tinan naruk ona.
"Ba ami, partidu boot rua ne'e (FRETILIN-CNRT) tenke hatene tuur hamutuk. Karik partidu boot rua ne'e la hatene tuur hamutuk maka PD konsidera dehan pesoál sira ba iha ne'ebá (FRETILIN no CNRT) tenta atu hafahe duni nasaun ne'e," dehan nia, iha Parlamentu Nasionál, Tersa (11/2).
Tuir Kalohan, partidu boot ho naran boot tenke mos iha kapasidade boot. Se lae, partidu boot ho naran boot sai de'it instrumentu ba ema seluk ne'ebé hamahan aan iha okos.
Ba PD rasik, sira la preokupa atu ba opozisaun ka kaer ukun hanesan de'it, tanba sira sente hotu ona. Maibé, importante ba sira maka oinsa partidu boot FRETILIN no CNRT tenke halo diálogu.
Entertantu, antes ne'e, diálogu entre lider sira ho Prezidente Repúblika rezulta alternativa tolu importante, inklui husu ba partidu polítiku sira iha asentu parlamentár atu buka-malu halo diálogu hodi hamosu konsertasaun polítika iha Parlamentu Nasionál. (*)