Vizita traballu ne'ebé halao iha loron 11 Fevereiru 2020, hodi verifika sistema servisu saúde integradu, disponibilidade profisionál saúde, funsionamentu ekipamentu médiku, inklui disponibilidade ai-moruk ba populasaun sira ne’ebé halo tratamentu iha postu saúde área ne'e.

Durante vizita traballu ne'e, ekipa konjuntu servisu saúde RAEOA hala'o mós diskusaun ho pesoál médiku kona-ba várius programa saúde nian hanesan prevensaun moras transmissíveis, saúde materna-infantíl, esforsu hodi  mellora nutrisaun no saúde ambientál.

Ekipa konjunta servisu saúde RAEOA rekoñese katak fornesimentu bee ba postu saúde sira sai mós kauza ne’ebé presiza hetan atensaun iha tempu oin-mai.

“Vizita ne’e nu’udar monitorizasaun trimestrál  hodi rona sira-nia preokupasaun, dezafiu no problema ne'ebé sira hasoru iha sira-nia servisu fatin” dehan Adjuntu Diretór Servisu Saúde Rejionál RAEOA, Facundo Lafo.

Rezultadu husi vizita traballu ekipa konjuntu servisu saude RAEOA propoin atu  monitorizasaun presiza hala'o ho másimu, hodi nune’e prestasaun ba atendimentu servisu setór saúde bele ezekuta ho maneira ideál liuhusi mekanizmu kontrolu ne’ebe efetivu.

Antes ne’e, Diretór Saúde RAEOA, Marcos Seo hamutuk ho ekipa konjunta servisu saúde RAEOA hala'o mós supervizaun direta iha terrenu hamutuk ho SAMES no Diresaun Nasionál Kontrolu Doensa, hodi distribui ekipamentu médiku protesaun virus Corona ba postu integradu iha RAEOA, liuliu ba postu entrada sira hanesan Sakato, Oesilo inklui postu hirak ne’ebe iha prezensa Unidade Polisia Fronteira (UPF), ne’ebé kolokadu iha Lakufoan, Kiubiselo, Haumeni Ana, Bijae Sunan, Noa Ana no Citrana. (*)