Ne'e duni, hafoin enkontru Primeiru Ministru, Taur Matan Ruak, lakohi komenta kona-ba asuntu polítika, mezmu jornalista sira husu pergunta polítika relasiona ho impase rai-laran.
Situasaun polítika ne'ebé akontese hamosu pergunta barak, ligadu ba enkontru entre lider nasionál rezulta opsaun tolu maka dahuluk, fó ba partidu ne'ebé hetan asentu parlamentár halo koligasaun foun.
Segundu, partidu polítiku sira iha asentu parlamentár buka malu diálogu no Taur Matan Ruak nafatin Primeiru Ministru to'o impase polítika hetan solusaun.
Rekursu ikus liu, bainhira la hetan dalan ba opsaun rua ne'e, maka foin bele hakat ba eleisaun antesipada.
Nune'e, jornalista sira hato'o pergunta sira ba PM Taur lakohi atu fó komentáriu ruma.
"Ha'u la mai ko'alia kona-ba partidu nian," dehan Taur, iha Palásiu Prezidensiál, Bairru-Pité, Kinta (13/2).
Enkontru semanál entre Xefe Guvernu ho Xefe Estadu ko'alia liu kona-ba virus Corona ligadu ba kondisaun estudante timoroan 17 ne'ebé daudaun ne'e iha karantina Whangaparāoa, Nova Zelándia. (*)