Tempotimor (Dili) - Partidu FRETILIN to'o agora seidauk halo kontaktu ruma ho partidu polítiku sira ne'ebé hetan asentu parlamentár hodi halo koligasaun foun ba formasaun governu.
Sekretáriu Jerál Partidu FRETILIN, Mari Alkatiri hatete, sei la halo movimentasaun polítika ho partidu sira seluk.
"Ha'u katuas bonitu ida hein ema seluk mak mai", dehan nia, hafoin soru-mutu ho Primeiru Ministru, Taur Matan Ruak, iha Palásiu Governu, Segunda (17/2).
Movimentu parpol sira ne'e relasiona ho opsaun ne'ebe Prezidente Repúblika, Fransisco Guteres Lú Olo, fó atu partidu ne'ebé hetan asentu iha parlamentár halo movimentasaun para bele hakotu impase polítika iha rai-laran.
Nia esplika, durante ne'e FRETILIN halo movimentu maibé la'ós ho partidu polítiku ho povu sira iha baze.
"Ami fin-de-semana halo hela movimentasaun polítika ho povu iha munísipiu hotu-hotu, falta munísipiu tolu mak seidauk", dehan Alkatiri.
Nia afirma, dadaun ne'e Partidu FRETILIN halo movimentasaun polítika ho povu, tanba povu mak sai hanesan aliadu ba FRETILIN. (*)