Sekretariu Jerál Partidu Demokrátiku (PD), Antonio da Conceição 'Kalohan' hatete, enkontru ho Prezidente Partidu CNRT, Kay Rala Xanana Gusmão, iha ona proposta konkreta ida hodi halo koligasaun foun, maibé partidu ne'ebé atu tama iha koligasaun seidauk klaru.
"Maun Boot Xanana nia disponibilidade atu hamriik fali iha oin hodi devolve fila-fali konfiansa ba povu no konfiaansa atu ita bele hala'o dezenvolvimentu ba ita nia rain", dehan nia, iha Sede PD, Kolmera, Tersa (18/2).
Sekretariu Jerál PD ne'e relata, konkreta iha proposta ne'ebe mai tiha ona husi CNRT, posivelmente CNRT lidera koligasaun ida maibe integrasaun membru sira ne'e sei halo komunikasaun ho kada partidu.
Nune'e, partidu PD la reprezenta partidu seluk maibe simu ona proposta ida husi CNRT atu forma koligasaun ida.