Tempotimor (Dili) - Partidu Demokrátiku (PD) bele de'it 'halo-aan' iha tempu agora, tanba iha partidu boot rua FRETILIN no CNRT ne'ebé hadau-malu atu halo koligasaun.
Maski nune'e, formalmente PD seidauk foti desizaun atu halo koligasaun ho CNRT ka FRETILIN.
Maibé PD rasik hakarak maka koligasaun ba Governu ne'ebé bele asegura kontinuidade hodi kompleta restu-du-mandadu tinan 5 nian ne'ebé povu fó fiar liu husi eleisaun antesipada liubá.
"Importante agora loke ona komunikasaun entre partidu no ami hatene ona intensaun partidu rua ne'e hotu oinsa mak atu fó solusaun ba problema," dehan Sekretáriu Jerál PD, Antonio da Conceição 'Kalohan' iha Sede PD, Tersa (18/2).
Bainhira halo komunikasaun ho CNRT, Prezidente Partidu CNRT, Xanana Gusmão, fó garantia atu utrapasa situasaun atuál.
Kalohan esplika, Xanana nia-prontidaun hamriik iha oin gaña fila-fali konfiansa husi povu atu bele halo dezenvolvimentu ba rai ne'e.
Entertantu, enkontru ho FRETILIN, PD rasik konfesa katak FRETILIN iha mós intensaun atu forma Governu ne'ebé posivelmente ho PLP no PD.
Enkuantu PD rasik agora hahú negosisaun ho partidu sira, prontidaun ne'ebé sai mekanizmu uza iha PD, maibe afirma hanesan partidu ne'ebé hamrik atu interese povu no lakohi krize impase polítika ne'e kontinua la'o. (*)