Hafoin liu husi movimentu politika ne'ebé manas uitoan, ikus mai partidu politiku neen (6), kompostu husi CNRT, PD, KHUNTO, PUDD, UDT/FM, konsege konvense malu hodi halo koligasaun.
Hafoin formasaun koligasaun foun ne'e, Laureadu Nobel da Paz José Ramos Horta husu ba Prezidente CNRT Kay Rala Xanana Gusmão atu tenke lidera governu dasia nu'udar Primeiru Ministru.
Ho ninia lideransa, Horta fiar katak governu ne'ebé Xanana lidera sei konsege rezolve problema, liu-liu kona-ba membru governu na'in 9 ne'ebé la hetan pose husi Prezidente Repúblika Francisco Guterres Lu Olo.
Eis Prezidente Repúblika ne'e afirma, Xanana mak tenke sai Primeiru Ministru (PM) iha governu dasia tanba Xanana iha esperensia no autoridade.
"Sim, ha'u mós hatete maun boot (Xanana) ita mak tenke kaer metin governu ho ita-nia autoridade ho esperensia no ami hotu-hotu tane ita-boot par serbisu la'o di'ak."
"Nia (Xanana) mak tenke ba asumi kargu ida todan ne'e, tanba nia iha esperensia tinan 20 ona iha governu, iha prezidensia, internasional, nia hatene ekonomia no hatene problema boot fronteira terestre, maritima," dehan Horta iha Sede CNRT Bairro dos Grilhos, Dili, Sabadu (22/02).