Tempotimor (Dili) -  Maske tuir transparansia Internasional Timor Leste iha VIII Governu ne'ebe lidera husi PM Taur Matan Ruak, iha tinan 2019 hetan ranking pozitivu 3 duke tinan ruma antes. Xefe Estadu preokupa ho volume korrupsaun ne'ebé kontinua boot iha nasaun ne'e. 

Prezidente Repúblika, Francisco Guterres Lú Olo, hatoo lia-hirak ne'e bainhira abertura aniversáriu Komisaun Anti Korrupsaun (KAK) ba tinan 10, iha Salaun Ministériu Finansas Ai-tarak Laran, Segunda (24/2).

"Ita preokupa ohin loron ho korrupasaun ne'ebé boot ba beibeik iha ita-nia rai, liuliu ho prátika husi ajénsia públiku sira," dehan Xefe Estadu.

Lú Olo akresenta, bainhira korrupsaun aas beibeik fó impaktu ba instituisaun sira labele halo servisu ho efisiénsia no situasaun ne'e la favorese negósiu atu hetan susesu.

Tuir nia, korrupsaun la'ós prejudika de'it ekonómiku no funsaun administrativa, maibé ameasa mós soberania nasionál.

"Tanba ne'e ita labele prátika no labele sai kumplise ba sé-sé de'it ka husik liu lala'ok aat ne'e, liuhusi dalan ne'ebé de'it," hatutan Lú Olo. 

Entertantu, husi dadus Komisaun Anti Korrupsaun iha tinan 2019, kazu korrupasaun hamutuk 73, husi númeru ne'e remete ba Ministériu Públiku hamutuk 56 no pendente ka sei kontinua investiga hamutuk kazu 17. (*)