Tempotimor(Dili) - Prezidente Repúblika hateten, Governu deside hodi revoga rezolusaun ne'ebe hodi bandu arte-marsiál, nune'e organizasaun arte-marsial bele obediese ba Lei Arma Branka.
Ne'e duni, Xefe Estadu konsidera, presiza anula rezolusaun ne'e hodi reativa arte-marsiál, nune'e grupu sira ne'ebé antes ne'e taka bele kumpre lei nu'udar organisaun desportiva.
"Re-ativa arte-marsiál liuhusi Lei. Ita hakarak atu haree arte-marsiál sira ne'e hanesan organizasaun desportiva no la'o tuir dalan lei ninian para sira bele partisipa iha desportu," dehan Xefe Estadu, Francisco Guterres Lú Olo, iha Salaun Ministériu Finansas, Ai-tarak Laran, Segunda (24/2).
Tuir PR Lú Olo, rezolusaun nu 16/2013 hodi bandu atividade arte-marsiál hanesan PSHT, KORK no IKSPTL hamate fali Lei nu 6/2017 kona-ba Arma Branka.
"Rezulusaun laiha forsa liu lei," dehan nia.
Prezidente Repúblika mós hato'o mensajen ba joven sira ne'ebé ativu iha grupu arte-marsiál atu la'o tuir nafatin lei ne'ebé governu husik hela, nune'e ativa hanesan desportu nu'udar timoroan no organizaun deportiva Timor nian.
Entertantu, liuhusi Konsellu Ministru, VIII Governu aprova revogasaun (hamoos) rezolusaun nú 16/2013, kona-ba bandu ba grupu arte-marsiál hanesan PSHT, KORK no KERA SAKTI.
Diploma ne'e rasik instrui mós Polisia Nasionál Timor-Leste (PNTL) atu intensifika asaun kombate krime sira kona-ba prátika ilísitu husi arte-marsiál no rituál sira. (*)