2019 Ema 94 Sai Arguidu Kazu Korrupsaun 

Komisariu Komisaun Anti Korrupsaun, Dr. Sergio Hornai Komisariu Komisaun Anti Korrupsaun, Dr. Sergio Hornai Foto Midia PR

Tempotimor (Dili) - Durante tinan ida Komisaun Anti Korrupsaun (KAK) prosesu kazu hamutuk 73. Husi totál ne'e define arguidu hamutuk 94 no sasin 792.

Husi totál kazu 73 ne'ebé prosesa iha 2019, hamutuk kazu 56 maka remete ba Ministériu Públiku, nunee restu 17 sei iha prosesu investigasaun.

Haree ba volume kazu ne'e, Prezidente Repúblika, Francisco Guterres Lú Olo rasik husu ba deputadu iha Parlamentu Nasionál atu aselera lalais aprovasaun Lei Anti Korupasaun (LAK) ne'ebé iha ona meza Parlamentu dezde 9 Jullu 2018.

Hataan ba LAK ne'ebé seidauk aprova iha Parlamentu Nasionál, Komisariu Sérgio Hornai hateten, KAK mós halo debate ba kestaun ne'e hodi bele atinje kombate krime korrupasaun.

"Iha enfaze ne'e ita-nia deskusaun ne'e mós ko'alia kona-ba polítika dezenvolvementu setór justisa, liuliu iha kombate krimenalidade korrupasaun ida mós kona-ba nia ordenamentu jurídika sira no mós ba iha planu estratejiku ne'e rasik," dehan nia, iha aniversáriu ba dala 10 KAK nian, Salaun Ministériu Finansas, Ai-tarak Laran, Segunda (24/2).

Sérgio hatutan, tenke iha mata-dalan no mós estratéjia nasionál propiu ba hotu-hotu tanba populasaun uitoan, maibé orsamentu barak atu halo finansamentu ba ekonomia dezenvolvimentu.

Tuir nia, presiza hasa'e liuliu ajende sira hanesan alfándega no apovizonamentu oinsá atu funsionáriu no intitusionál sira iha kbiit halo jestaun ba orsamentu nune'e bele fó reseita ba Estadu.

Selebrasaun aniversáriu KAK ba tinan 10 hetan partisipasaun husi Prezidente Repúblika, Francisco Guterres Lú Olo, Reprezentante FALINTIL-FDTL, PNTL, Ministériu Públiku, PDHJ, korpu diplomata no membru governu.(*)

Rate this item
(1 Vote)
Last modified on Monday, 24 February 2020 17:49
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com